ഉറക്കത്തിനിടെ കൊലപാതകം ചെയ്യുമോ? ഉറക്കദിനത്തില്‍ ഉറക്കത്തെ കുറിച്ച് ചില അമ്പരപ്പിക്കുന്ന കാര്യങ്ങള്‍ അറിയാം

ഇന്ന് മാര്‍ച്ച് 13 - ലോക ഉറക്ക ദിനം. കൊവിഡ്-19 കാരണം ലോകത്തിന്റെ ഉറക്കം നഷ്ടപ്പെട്ട സമയത്താണ് ഉറക്കദിനം എത്തിയിരിക്കുന്നത്. എല്ലാ വര്‍ഷവും മാര്‍ച്ച് വിഷുവത്തിന് (March Equinox) തൊട്ടു മുമ്പുള്ള വെള്ളിയാഴ്ചയാണ് ഉറക്ക ദിനം ആചരിക്കുന്നത്.  'മെച്ചപ്പെട്ട ഉറക്കം, മെച്ചപ്പെട്ട ജീവിതം, മെച്ചപ്പെട്ട ഭൂമി' എന്നാണ് ഈ വര്‍ഷത്തെ ഉറക്ക ദിനത്തിന്റെ മുദ്രാവാക്യം. 

ഈ ഉറക്ക ദിനത്തില്‍ ഉറക്കത്തെ കുറിച്ച് ചില കൗതുകകരമായ വസ്തുതകള്‍ വായിക്കാം:  

• മനുഷ്യര്‍ തങ്ങളുടെ ജീവിതത്തിന്റെ ശരാശരി മൂന്നിലൊരു ഭാഗവും ഉറങ്ങുന്നു.
• പൂച്ചകളാകട്ടെ ജീവിതത്തിന്റെ മൂന്നില്‍ രണ്ട് ഭാഗവും ഉറങ്ങിത്തീര്‍ക്കുന്നു. 
• ഭക്ഷ്യക്ഷാമത്തേക്കാള്‍ കൂടുതല്‍ മരണത്തിന് കാരണമാകുന്നത് ഉറക്കമില്ലായ്മയാണ്. 
• ലോകത്തെ 12 ശതമാനം ആളുകള്‍ സ്വപ്‌നം കാണുന്നത് ബ്ലാക്ക് ആന്‍ഡ് വൈറ്റ് ആയാണ്. 
• ലോകത്തെ 15 ശതമാനത്തോളം പേര്‍ ഉറക്കത്തില്‍ എഴുന്നേറ്റു നടക്കുന്നവരാണ്. 
• രാവിലെ ഉറക്കമുണര്‍ന്ന് കട്ടിലില്‍ നിന്ന് എഴുന്നേല്‍ക്കാന്‍ ബുദ്ധിമുട്ടുന്ന അവസ്ഥ ഡിസേനിയ (Dysania) എന്ന് അറിയപ്പെടുന്നു. 
• ഉറക്കത്തിനിടെ അസാധാരണമായ കാര്യങ്ങള്‍ ചെയ്യുന്ന അവസ്ഥ പാരസോംനിയ എന്ന് അറിയപ്പെടുന്നു. പാരസോംനിയ ഉള്ളവര്‍ കുറ്റകൃത്യങ്ങള്‍ വരെ ചെയ്തിട്ടുണ്ട്.
• നാലിലൊന്ന് ദമ്പതികളും വെവ്വേറെ കട്ടിലുകളിലാണ് കിടക്കുന്നത്. 
• ഉറക്കമുണര്‍ന്ന് അഞ്ചു മിനുറ്റിനകം കണ്ട സ്വപ്‌നത്തിന്റെ 50 ശതമാനവും നമ്മള്‍ മറന്നു പോകും. 
• ഉറക്കം കുറഞ്ഞാല്‍ വേദന സഹിക്കാനുള്ള ശേഷി കുറയും. 
• സാധാരണഗതിയില്‍ രാത്രി കിടന്നാല്‍ മനുഷ്യര്‍ 10 മുതല്‍ 15 മിനുറ്റിനകം ഉറങ്ങും.  
• കൂടുതല്‍ സമ്പാദിക്കുന്നവര്‍ക്ക് മികച്ച ഉറക്കം ലഭിക്കും. 
• ഉറക്കമില്ലാതെ പരമാവധി ദിവസം ജീവിച്ചതിന്റെ റെക്കാര്‍ഡ് കാലിഫോര്‍ണിയക്കാരനായ റാന്‍ഡി ഗാര്‍ഡ്‌നറുടെ പേരിലാണ്. വിദ്യാര്‍ത്ഥിയായിരിക്കെ 1964ല്‍ 11 ദിവസമാണ് ഇദ്ദേഹം ഉറക്കമില്ലാതെ കഴിച്ചു കൂട്ടിയത്. മരണത്തിന് വരെ കാരണമാകുന്നതിനാല്‍ ഇത്തരം സാഹസങ്ങള്‍ക്ക് ഒരിക്കലും മുതിരരുത്. എല്ലാ ദിവസവും ആവശ്യത്തിന് ഉറക്കം ലഭ്യമാക്കണം.